wajue wagombea Urais wa Kenya kwa ungani wao.

Uhuru Muigai Kenyatta

Naibu waziri mkuu wa Kenya tangu mwaka 2008, Uhuru Kenyatta, alizaliwa tarehe 26 Oktoba mwaka 1961 kwa Mama Ngina na Mzee Jomo Kenyatta, ambaye alikuwa Rais wa kwanza wa Kenya, kati ya mwaka 1964-1978, na akaitwa "Uhuru", neno la Kiswahili linalomaanisha ukombozi kutoka kwa wakoloni.
Mrithi wa mashamba makubwa Kenya, anatajwa kuwa nambari 23 katika orodha ya watu matajiri zaidi Afrika akiwa na thamani ya dola milioni miatano.
Uhuru, anayejulikana na wafuasi wake kama "Njamba" neno la Kikikuyu, linalomaanisha, Shujaa, ni mgombea wa urais wa muungano wa Jubilee, ambao ni muungano wa vyama vya TNA chake Kenyatta, (URP) na (Narc). Mgombea mwenza wake ni William Ruto wakisaidiana na Charity Ngilu,
Mwalimu wake wa siasa ambaye ni Rais mstaafu, Daniel Moi alimuingiza katika siasa kwa mara ya kwanza na kumpendekeza kuwa mgombea wa urais licha ya kutokuwa na uzoefu wa kisiasa wakati wa uchaguzi wa mwaka 2002.
Hata hivyo, Uhuru alishindwa pakubwa na mpinzani wake, Rais mwai Kibaki na hivyo kumfanya kuwa kiongozi rasmi wa upinzani bungeni.
Uhuru aliungana na Raila kupinga rasimu ya katiba iliyopendekezwa na Kibaki mwaka 2005, lakini baadaye wakatengana huku Uhuru akimuunga mkono Kibaki katika kugombea muhula wa pili.
Kibaki, alitangazwa mshindi katika uchaguzi uliokumbwa na utata mkubwa na punde baadaye akamteua uhuru kama waziri wa serikali za mitaa.
Baada ya kibaki na odinga kutia saini makubaliano kusitisha mapigano, Uhuru aliteuliwa kama mmoja wa manaibu wawili wa waziri mkuu na kisha baadaye akateuliwa kuwa waziri wa fedha. Lakini alijiuzulu baadaye baada ya kupatikana na makosa ya kujibu katika kesi yake ICC ya uhalifu wa kivita kuhusu ghasia za baada ya uchaguzi mwaka 2007.

Uhuru na mgombea mwenza wake William Ruto. Wote wanakabiliwa na kesi katika mahakama ya ICC

Kenyatta atafika mahakamani baada tu ya uchaguzi wa mwezi Machi, kwa kosa la uhalifu wa kivita ICC. Mgombea mwenza wake, William Ruto, pia anakabiliwa na makosa hayo hayo.
ICC, inamtuhumu kwa kupanga mashambulizi yaliyofanywa na kundi haramu ya Mungiki, Kufanya mashambulizi ya kulipiza kisasi dhidi ya kabila la wjaluo baada ya wale wa kabila lake wakikuyu kushambuliwa katika mkoa wa Rift Valley.
Ruto na Uhuru walijitetea vikali dhidi ya tuhuma za ICC, na kusema kuwa waziri mkuu Rail Odinga anapaswa kuwajibikIa ghasia zilizotokea baada ya uchaguzi mwaka 2007/2008
Kama Waziri wa Fedha, Kenyatta alikuwa katika Msitari wa mbele kuleta mageuzi katika wizara ya fedha na ambavyo serikali hufanya biashara zake. Hasa katika kupanga makadirio ya matumizi ya pesa za serikali kupitia mitandao ya kijamii.
Alikuwa waziri wa kwanza wa Kenya kuzindua ruwaza iliyoundwa kwa kuhusisha wananchi na kutilia mkazo katika kutumia mitandao ya kijamii katika uundaji wa sera za chama chake.
Kenyatta anaahidi kuleta mageuzi ya kijamii,kisiasa na kiuchumi na anawaalika wakenya wote kuhusika na uundaji wa sera za chama chake.
Pia anaahidi kutoa hekari milioni moja ya mashamba kwa ajili ya ukulima wa unyunyiziaji maji mimea na kupanua kilimo katika kipindi cha miaka mitano.

Raila Amolo Odinga

Raila Odinga alizaliwa Januari tarehe 7 mwaka 1945 Magharibi mwa Kenya mkoa wa Nyaza. Raila, anayejulikana kwa wafuasi wake kama "Agwambo" kumaanisha mwenyekiti kwa lugha yake asili ya Dholuo, ni waziri mkuu wa kwanza wa Kenya , wadhifa ulioundwa kufuatia mkataba wa kitaifa ulioafikiwa baada ya ghasia za baada ya uchaguzi mwaka 2007-2008 kama ishara ya kugawana mamlaka.
Alitia saini mkataba wa kugawana mamlaka na Rais Mwai Kibaki ili kumaliza ghasia za miezi miwili zilizokumba nchi baada ya uchaguzi uliokumbwa na utata.
Raila mwenye umri wa miaka 68 wa chama cha ODM ingawa kwa sasa anagombea urais kwa muungano wa CORD, ameamua kushirikiana na makamu wa Rais Kalonzo Musyoka, ambaye pia alikuwa hasimu wake miezi miwili tu kabla ya uchaguzi wa mwaka 2007.
Aliondoka kutoka chama cha ODM na kuunda chama chake ODM-Kenya na hata kuitikia uteuzi wake kama makamu wa rais wa serikali ya Rais Mwai Kibaki.
Kama hayati babake, Jaramogi Oginga Odinga, Raila ambaye ni waziri mkuu wa kwanza wa Kenya, kwa miaka minane aliishi kukamatwa na kuachiliwa mara kwa mara tangu mwaka 1982 hadi 1991 kwa harakati zake za kupigania mageuzi wakati wa muhula wa pili wa utawala wa rais Daniel arap Moi.
Kufuatia kuundwa kwa katiba mpya, mwezi Agosti, mwaka 2010, amekuwa akisema kwenye kampeini zake kuwa nia yake ni kuleta mageuzi ya kisiasa.
Raila ni mwanasiasa anayesifika sana kwa ushawishi wake kisiasa na ambaye amekuwa katika msitari wa mbele kuunda vyama vya miungano na wanasiasa ambao ni mahasimu wake.
Baada ya uchaguzi wa mwaka 1997 ambapo Raila alishikilia nafasi ya tatu, kufuatia kuundwa kwa muungano wa chama chake (NDP) na chama cha rais wa zamani Daniel moi (KANU), aliteuliwa kama waziri wa kawi katika serikali ya muhula wa mwisho wa Moi.
Mwaka 2002, baada ya Moi kumuunga mkono uhuru Kenyatta, kama mrithi wake, Raila na maafisa wengine wa KANU ikiwemo Kalonzo Musyoka na wafuasi wengine, walipinga ungwaji mkono wa Kenyatta kugombea Urais. Waliungana na kiongozi wa upinzani Mwai Kibakina na kuunda muungano wa National Rainbow Coalition (Narc) ambao baadaye ulishinda uchaguzi wa mwaka 2002.

Raila aliungana na Rais Mwai Kibaki kuunda serikali ya Muungano ya NARC baada ya kumuondoa mamlakani rais mstaafu Daniel Moi

Mwaka 2005 aliungana na Uhuru Kenyatta aliyekuwa kama kiongozi rasmi wa upinzani, ili kushinda kura ya maoni kuhusu rasimu ya katiba chini ya serikali ya rais kibaki .
Wakati Kibaki alipomfuta kazi na washirika wake, aliunda chama cha ODM ambacho kilipiga kura ya La dhidi ya rasimu ya katiba mpya. Aliongoza kampeini mwaka 2007 na kwa shingo upande kukubali ushindi wa rais Kibaki
Katika uchaguzi uliokumbwa na utata , ghasia na mauaji. Lakini hatimaye alilazimika kujiunga na Kibaki katika serikali ya Muungano.
Disemba mwaka 2012, Raila alilazimika kupiga moyo konde na kurudiana na Kalonzo Musyoka chini ya muungano wa CORD, kwani daima husema katika siasa, hakuna maadui wa kudumu.
Raila anaamini kuwa wakenya wanastahili kuhudumiwa vyema zaidi kuliko ahadi wanazopewa na kwamba chini ya utawala wake, Raila anaahidi kuleta mageuzi na kuhakikisha uongozi bora. Anaahidi kuwa serikali yake itaekeza katika viwanda vya kisasa , mabohari pamoja na vituo vya teknolojia ya mawasiliano katika maeneo ya kuvulia, ushirikiano na sekta ya kibinafsi ili kuimarisha kilimo.

Martha Wangari Karua

Alizaliwa tarehe 22 Septemba mwaka 1957 mkoa wa kati. Na yeye ndiye mgombea wa pekee mwanamke katika uchaguzi huu. Aliajiriwa kama hakimu akiwa na umri wa miaka 24 kabla ya hata kuwa mbunge miaka kumi baadaye.

Mgombea wa muungano wa National Rainbow Coalition (Narc-Kenya), Karua alimteua mwanauchumi Augustine Chemonges Lotodo kama mgombea mwenza wake. Lotodo pia amewahi kuwa mbunge katika bunge la Afrika Mashariki
Karua mwenye umri wa miaka 55, alikuwa mwanachama wa upinzani ambao walipigania siasa za vyama vingi nchini Kenya mapema miaka ya tisini chini ya utawala wa rais mstaafu Daniel Moi aliyekua anaongoza kimabavu chini ya chama kimoja.
Mkereketwa wa demokrasia na maswala ya wanwake nchini Kenya, Karua alihusika na kupigania haki za wanawake kwa kutaka uungwaji mkono katika maswala yanayowahusisha wanawake wenyewe.
Karua alikuwa mfuasi mkubwa wa rais Mwai Kibaki na sera zake hadi tarehe sita Aprili mwaka 2009 wakati alipojiuzulu kama waziri wa sharia, akielezea kuwa kazi yake ilikuwa inaingiliwa sana na baadhi ya maafisa wakuu serikalini.
Aliongoza upande wa serikali wakati wa mapatano kati ya Raila Odinga na Kibaki ili kumaliza ghasia za baada ya uchaguzi.
Pia aliwahi kuhudumu kama waziri wa maji aliyepigia debe sana sheria ya maji ya mwaka2002 ambayo ilichochea mageuzi katika sekta hiyo.
Karua anaahidi kuleta mageuzi katika sekta ya afya, elimu, uongozi bora kubuni nafas za kazi, kuhusisha vijana katika maswala ya uongozi na kuhakikisha serikali yake inafanya kazi kuboresha maisha ya wananchi.